مقاس غريب .. مقاس الأغراب


بدأ الكلام وانا واقف في أول الطريق ومافيش ورايا تاريخ أرجعله لو نخييت في وسط السكه.

ترددت  بالرغم من اني بعد شوية مشي اكتشفت اني مافكرتش في كل الاحتمالات.

أخدت النفس ومشيت والخطوه كانت للاسف أسرع من قوة احتمالي.

ومشيت وباصص علي الهدف الي كل اما اقرب يبعد  فتفضل المسافه بيننا ثابته.

قلت يمكن السرعه خفيفه شد شويه يا واد يمكن الهدف متحرك.

فجريت شويه وحسيت انه فعلا بيقرب . ركزت نظري عليه والابتسامه في وشي ضيقت عيني  من وسعها .

مافقتش الا وانا واقع علي الارض ووشي متعاص طين مع ان الارض ماقيهاش طين .

قمت وكملت بس مشيت وماجرتش .

نسيت الهدف وبصيت تحت رجلي خايف لقع تاني . وانا اصلا مش فاهم هو انا وقعت ليه .

يعدي الوقت وافتكرت انا هنا ليه وكأني كنت نسيت .

الهدف بيبعد والتفاصيل بهتت . فقررت أجري تاني .

المره دي الجري مابقاش ينفع . أصل الهدف بعد أكتر من اللازم .

يعني أطير ولا اقف ولا أمشي . مابقتش فارقه كده كده مش هوصل .

قعدت ونمت وحلمت بالايام الي ماعشتهاش . أيام متفصله علي كل المقاسات الا مقاس واحد .

مقاس غريب .

لو حاولت اغيره . اما هعوم واغرق او هتخنق و ارجع .

وصحيت علي كابوس طلع في الاخر سؤال .

هو أصلا ايه الهدف . مايمكن مش علي مقاسك ؟

بصيت أسال مالقتش اصلا حد . سكتك يابني مقاسها مش علي حد . طيب مايمكن أساسا مافيش سكه . يمكن ويمكن انت جوه الحلم .

في تفصيله ناقصاني عشان اعرف هكمل لفين . هو انا اكيد عارف ليه و من أمتي كمان.

يمكن لو غيرت مقاسي اوصل اسرع. يمكن الجريه تجيب نتيجه .

يا بني ماحدش بيغير مقاسه . مقاسك ليك وللي زيك . هتغيره يمكن تعيش بس السكه هتتغير . هتوصل بس لمكان تاني .

انا بكره التغيير . وبكره التبديل . خليني في مقاسي . انا اصلا عاجبني المقاس .

قمت متسند و مشيت كما كنت.

مشيت تاني وبطلت ابص علي الهدف يمكن اوصل . اصل زمان قالولي ماتستناش الحاجه تيجي بسرعه .

شويه ورجلي تعبت . مابقتش قادر اكمل .

بس لسه في نفس للمشي . بس في الغالب مشي مايوصلش . بصيت ورايا . بس ماقدرتش

عدلت وشي ناحية الهدف و مشيت تاني .

كملت مشي . بس عشان ماعنديش خيار تاني .

سكة الرجوع انا سدتها من زمان .

اما المكان فماينفعش يعيش فيه انسان .

والسكه مفتوحه بس الي يقدر يكمل .

يمكن يظهر في الطريق عصفور . يغني. بس مش هقرب له .

أصل اكتشفت في النهايه ان مقاسي ماينفعش يعمل حاجتين .

مقاسي ماينفعش يضحك .

و مقاسي بيطير العصافير .

مقاسي لازم يمشي في السكه لاخرها .

وادينا مكملين ..

Advertisements

2 thoughts on “مقاس غريب .. مقاس الأغراب

  1. تدوينة رمزية جدا .. عجبتني وكالعادة بلاقي نفسي في كل الكلام بتاعك

    وبالنسبة لموضوع العصافير .. اكتشفت إن مش لازم نمتلك كل الحاجات الحلوة .. ممكن نتفرج عليها من بعيد ونستمتع بيها ونكتفي بكدا 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s